OʻzTMK AJ - Oʻzbekiston-Yaponiya yoshlar innovatsiya markazida
Bugun “Oʻzbekiston Texnologik Metallar Kombinati” AJ (OʻzTMK AJ) mutaxassislari Oʻzbekiston-Yaponiya yoshlar innovatsiya markaziga tashrif buyurishdi.
Tashrifning asosiy maqsadi - mashinasozlik va materialshunoslik, shuningdek konchilik va mineral xomashyolarni chuqur qayta ishlash yoʻnalishlarida ikki tomonlama hamkorlikni o‘rnatish, ilmiy-texnik tajriba almashish va qo‘shma innovatsion loyihalarni yo‘lga qo‘yishdan iborat bo‘ldi.
Uchrashuv davomida tomonlar o‘z faoliyat yo‘nalishlari bilan tanishib, yosh olimlar tomonidan yaratilayotgan innovatsion ishlanmalar va zamonaviy laboratoriyalar faoliyati bilan yaqindan tanishdilar.
OʻzTMK AJ vakillari texnologik metallarni qayta ishlash, yangi avlod qotishmalarini yaratish hamda eksport salohiyatini oshirish yo‘nalishida olib borilayotgan ilmiy-texnik faoliyat haqida maʼlumot berishdi.
Uchrashuv yakunida tomonlar hamkorlik memorandumini imzolash hamda istiqbolda qoʻshma ilmiy-tadqiqot loyihalarini amalga oshirish borasida kelishuvga erishdilar.
Mutaxassislarning taʼkidlashicha, ushbu tashrif innovatsion hamkorlikning yangi bosqichi bo‘lib, texnologik metallarni qayta ishlash, yangi yechimlar yaratish va ilm-fan yutuqlarini ishlab chiqarishga joriy etishda muhim ahamiyat kasb etadi.
